Peng Lam thucin-Penglam Upna

Thupatna
Zomi te in Penglam tangthu nei hi hang. Penglam pen a om taktak mah hiam? Thei khang. Ahi zongin Penglam tangthu tawh a kibang upna Zomi
te lakah om sim tham hi. Peng Lam tangthu himhim pahphot pen uphuai khin lo napi-in, genteh nadingin bel kizang thei mahmah hi.

Penglam misi theih
Khatvei Penglam gunkuang khat tawh tui tungah a vak leh misi khat mu.

Tua misi pen tuikia ahi manin puak gawpa lian mahmah ta hi ci. Penglam in bel a si sa lo-in, bang nek bang kham liang na hia ci-in a gunkuang
tungah koihin tui nawl ah paipih-a tho ta in, ci tha pai hi ci.

A uihte a si
Mi khat in Penglam a muh ciangin heih mihaipa, tua na mi photphot a si ai veleh a cih leh Penglam in bangci bang inmaw, a sih? Ci-in dawng
hi. Mipa in zong si kisa-in a uih keei ta ve! lawmlawm vecin a cih leh, Peng Lam in a uihte a si maw? Ci-in donga, mipa in zong hi ei, a
uihte a si kici ei! Ci-in dawng hi.  Tua leh Peng Lam in zong a uihte a si ci-in pom pah vilvel hi.

Veih uih then leh Peng Lam ciangkhut
Peng Lam in zong tua “a uihte a si” cih kammal pen ciamteh pah lianin, a paipai leh a misi uih teng a dikdikna a sung puak gawp hi ding hi ven, a veih hong paipai a, amah le amah uih cih takin uih kisa ta ahi manin, si ing ei. Si ing ei, ci-in awng ziahziah hi ci. Puteek khat ciang khut khunsa-a ong pai khat tawh kituaka, nang heuh si veni cim,
ci-in a ciang khut tawh a sat ek leh a veih uih theng tawh kituak lian ahi manin dam pah ingh ei. Na ciang khut in misi tho kiksak thei ahi manin kei ong pia in ci-in a nget leh puteek pa in zong na deih leh tang zen heuh ve, ci-in pia pah hi.


Peng Lam misi phot
Peng Lam zong tua ciangkhut masuanin a paipai leh khua khat tunga, tua khua ah nungakno khat si ahi manin, a innkuanpihte na kap ngeingai uh
hi. Peng Lam in zong ke ke ke, na vek un pusuak keimah in hih na tanu si uh ong thokik sak ding hi ing, ci-in gen a, misi nu’ innkuanpih khempeuh a pua ah pusuak pah uh hi. Peng Lam in zong thucin maanlo ciangkhut pi tawh tua misi nu sat cih takin sat a, tho thei mahmah lo hi.

 Hun sawt lua khin ahi manin misi nu’ nu le pa in zong um khang ei ci-in a va et uh leh Peng Lam in a tanu si uh sat cih takin sat sak gawp leltak ahi manin amau zong pai-in Peng Lam mana, hih bangin ka tanu sisa uh nong sat sak gawp sangin “Hi hi hi,” ci-in ong kah pih lecin ko lungdam zaw ding hi ve ung ci-in hawl khia hi.

Peng Lam a kah leh sakhi tai
Peeng lam zong “Hi hi hi” cih thucin ciamteh lianin a pai pai leh, lam kal mun khat ah papi khat in sakhi kap lian dinga thau tawh a ngimngim
laitak a kiangah va pai-in “hi hi hi” ci-in kap dih lai zang hi ci.

Tua leh sakhi zong tai pah a, papi pa in sakhi kap thei nawn lo ahi
manin, lawmlawm vecin nangpa, na min bang ahia? Hih khawng ah nong kah
dihdih zenzen laizang sangin ka sa kap ding ong ngim pih lecin, sakhi
man leng nang zong ong hawm ding hi veng, Piau Puau, a cih leh Penglam
in ka min Piau Puau hi kei Peng Lam hi ci-in dawng ziau in, pai san
leuleu hi.

Peng Lam’ mi gep
Khua khat a tun leuleu leh nupa nih kitawng ziahziah in, a inn sung a
inn pua uah a van khempeuh uh pai zihziah in, a lawtkhiat ziahziah
laitak uh Peng Lam in ong tuak lian leuleu hi. Amah zong sakhi kap
dinga ngimngim pa’ thu gen bangin a gal pan tua nupa kitawngte gel
gemgemin ngimngim-a a gei a tunteh, tua nupate in nangpa aw e, a
bangci na hia? Ko nupa kitawng tua bangin nong gepgep zawzen sangin
ong khen lecin, ko lungdam mahmah ding hi ve ungh, ci-in a gen leh
Peng Lam in zong, aw hi maw? Khen ding hi ei, khen ding hi ei, ci-in
pom tinten pah leuleu hi.


Peng Lam’ thu sial khen
A paipai leh, gamlak munkhat tungtun gei khat ah zangsial nih na kisi
ziahziah a, Peng Lam in zong heih heih heih, lawmte kitawng lo kitawng
lo ci-in zangsial kisi kim lai a va khen keei dih leh tua zangsialte
gel in Peng Lam si lum kha uh hi ci-in Peng Lam tangthu ka nu in ong
gen ngei hi. Peng Lam bangin thu cian ngei lo-pi in ih sial khen
pahpah leh kisih lawh thei hi.

Peng Lam thucin, Peng Lam upna ih cih pen tua bang dan peuh hi.
Khangluite in mittaw sial khau let a cih hih bangdante pawl hi dingin
ka um hi. Ahi zongin ih theih ding ah, thumaan thutak pen mittaw sial
khat let banga ih let ding a kilawm na hi leuleu hi. Ei mawhneite,
mittawte ih hih manin, khua hong musak thei Pasian kammal Lai Siangtho
tawh kisai ah mittaw sial khau let banga ih let ding ih up ding ih pom
ding hi leuleu hi.

Peng Lam community a zom om lai ding hi.

Suang Dal